السلام عليكم ورحمة الله وبركاته
من فضلك يا أستاذ ناصر من غير اسم انا متجوز من ٨ سنين ومتجوز مراتى عن حب احنا الاتنين كان بيحصل بينا زاى اى اتنين مشاكل فى بيتنا بس كنا بنرجع نتصالح ونعدى فى ال ٨ سنين دول مارحتش بيت ابوها مره غضبانة
من سنة قالتى انا خارجة اشترى حاجات قولتلها ماشى وانا نزلت اقابل واحد صاحبى وبالصدفه صاحبى قالى عاوز ادخل اشترى حاجة من مول كدا فاقلتله يالا دخلنا المول لاقتها قاعده ما اتنين معاها فى الشغل انا كنت قلتلها لا تقعدى معاهم ولا تكلميهم حتى
المهم ساعتها بجد ماكنتش عارف اعمل ايه اروح اجبها من شعرها ولا اعمل ايه بس كتمت غضبى ومشيت وبعدها بساعه كلمتها فى التلفون اسألها روحتى وكنتى فين قولت يمكن تقولى وتعترف بالغلط من نفسها قالت اشتريت حاجات وجيت البيت ولما روحت كل اللى عملته لاننا كنا بقينا بالليل قولتلها الصبح تكلمى اهلك يجوا يخدوكى وعرفتها انى شفتها وأنها كدابه
امها جت وغلطتها وهى قالت إنها خافت تقولى أنها هتقابلهم مارداش اخليها تنزل وكدا
وسألت شيخ قالى سامح وماتخربش بيتك وطالما هى قالتلك مش هتـ,ـكـ,ـدب عليك تانى خلاص سامح وربنا بيغفرا وكدا وعديت الموضوع
وفات سنة من كام شهر كانت مع واحده صاحبتها وصحبتى انا كمان بحكم انا اعرف جوزها وبنروحلهم وبيجلنا اصدقاء عيلة وكدا وبالصدفه انا عرفت وانا بتكلم مع صحبتى دى أنهم شربوا شيشه وانا منبه عليها ماتعملش كدا .
وعرفت وماقولتلهاش انى عرفت غير من قريب . فى ال ٨ سنين جواز محصلش نصيب نخلف وانا كنت راضى وكدا . هى بتتعب من اقل حاجة والدكتور قال ممكن نخلف بعمليه وانا عشان عارف ان صحتها مش هتستحمل بهدله فراضى .
اخر مره بنتكلم عن الخلفه قولتلها انتى مش هتخلفى حتى بعمليه وانا مش عاوز ياستى اخلف مع العلم اهلى وكل حد اعرفه دايما يسألونى ويسمعونى كلام فى الموضوع دا بيكون صعب واللى مر بدأ عارف كدا كويس .
زعلت انى قولتلها كدا . المهم الموضوع عادى واخر خناقه من شهرين جيت تقولى عاوزه اشرب سجاير وفضلت اتناقش معاها فى الموضوع دا لحد ماعرفت أنها مصحبة واحده بتشرب سجاير وكدا فقولتها تسيب الشغل انا الحمدلله مكفى بيتى وهى مابتدفعش حاجة فى البيت وانا مش مستنى دا .
المهم قالت لا شغلى ومش هاسيبه شدينا فى الكلام فغلطت فيا وشـ,ـتمت وكدا وانا عديت غلط الشتيمه عشان معملش مشكلة دا مره واتنين واخر مره خدتها ورحت ل اهلها وحكيت اللى حصل . ومشيت واستنيت اشوف رد فعل من اهلها حد يقولى حقك عليا تعاله خد مراتك ورحوا بيتكوا .ماحصلش ولقتها بتقولى انا عاوزه اطلق وشكل اهلها موافقنها على كدا عشان دخلت بيت مايفهموش فى الأصول من الأول وخراب البيت عندهم سهل ورغم أن ماحدش كلمنى انا حاولت ارضيها واقولها انا مسامح فى حقى وماتزعليش ونرجع وحرام نخرب بيتنا مافيش بردوا عاوزه اطلق مع اصرارى بردوا انها تثيب الشغل.كل اللى على لسنها اطلق .اسف لو طولت يس مش عارف اعمل ايه هل اطلقها خلاص كده ولا احاول تاني لاني لسه باقي عليها وبحبها ومش عاوز اخرب البيت
