انا راجل عندي 27سنة من الأرياف قريت الفاتحة على بنت عندها 25 سنة من أسبوعين واتفقنا إن الخطوبة هتكون بعد العيد عشان أخوها الكبير مسافر وهييجي إجازة وقتها
البنت يتيمة الأب والأم وعايشة مع أخوها وجدتها وده كان مخلي قلبي حنين ناحيتها وحابب أكمل معاها بس في حاجة مضا.يقاني ومش قادر أعديها
عندنا في البلد العروسة هي اللي بتجيب حاجات الجهاز زي السجاد المفروشات أدوات المطبخ السخان وكمان شوية أجهزة زي الغسالة الفريزر الشفاط لما بدأنا نتكلم في الجهاز قالتلي إن أبوها الله يرحمه قبل ما يتوفى من 4 سنين كان مجهزها وجايبلها كل الحاجات دي وحاططها في المخزن بالكرتونة عشان يطمن عليها ويضمن إنها ما تتعبش وقت الجواز خصوصًا إن الأسعار كانت بتزيد
أنا بصراحة بحب الحاجة الجديدة ولما قالتلي على أنواع الأجهزة لقيت إن أغلبها قديم والحاجات بقت أحدث وأسهل في الاستخدام وفيها إمكانيات مش موجودة في الأجهزة اللي عندها فقولتلها بصراحة مش مرتاح للحاجات دي والمفروض كنتوا تستنوا وقت الخطوبة وتجيبوا الحاجة اللي تناسب الزمن اللي إحنا فيه لازم تغيريها الناس هتتريق
ردها كان إحنا معندناش فلوس نغير أي حاجة والأسعار دلوقتي بقت الضعف ولو مش عاجباك لما نتجوز غير براحتك طيب إزاي يعني أمضي على قايمة بحاجة قديمة وبعدين أروح أشتري غيرها من جيبي قالتلي هنكتبها بنفس الأسعار اللي اشتريناها بيها ومعانا الفواتير لو حابب تراجعها
وقتها قولتلها صراحة بصي أنا مش هطلب منك تجيبي حاجة فوق طاقتك بس لازم تعملي حسابك إن العفش اللي هتدخليه يكون أحدث من عفش مرات أخويا على الأقل لأن مش معقول هبقى متجوز جديد وجهازك يكون أقل منها خصوصًا إن جوزها متجوزها من 3 سنين بس والحاجات بتاعتها أحدث بكتير
لقيتها زعلت معرفش ليه مع ان دا حقي لاني هبقي جوزها وعاوز بيتنا يبقي احسن بيت الموضوع بدأ يوسع شوية لما أمي دخلت فيه بصراحة أمي مش مقتنعة بيها من البداية وبتقول إن جمالها عادي مش حاجة مميزة وأنا ممكن ألاقي أحسن منها دلوقتي بعد موضوع الجهاز زاد اقتناعها إن الموضوع مش هيكمل وإنها شايفة إن حاجتها قديمة وإن ده مش هيبقى مناسب لي خصوصًا إن مستوى بيتنا أحسن شوية وبدأت تقولي طب ما بدل ما تدفع بعد الجواز عشان تجدد الجهاز ما تبدأ بواحدة مجهزة حاجتها أحسن من الأول خصوصًا إن الجهاز حاجة أساسية وهتعيش معاك سنين
بصراحة بدأت أحس إن كلامها مظبوط وإن بدل ما أدخل نفسي في حاجة بعد الجواز وأتحمل مصاريف زيادة من الأول ألاقي حد ظروفه مناسبة أكتر ومش محتاج إني أغير وأصرف تاني
