مشكلة اخت
بصو بأختصار انا متجوزه في بيت عيله بس انا وسلفتي معزولين و دة اول رمضان ليا متجوزه و كان نفسي زي اي واحده تفطر ف بيتها مع ديكور رمضان و الجو اساسا حر ف اقعد ببجامتي وبراحتي
لاقيت حماتي طالعه ليا انا وجوزي و طالبه مننا ننزل نقضي معاها رمضان معاها وهي وحمايا طبعا مجبتش سيره سلفتي وهي اساسا موظفه ومالناش كلام سوا يعني ازيك وبس
ف انا فضلت اقولها معلش خليها السنه الجايه لان دا اول رمضان وانا نفسي اقضيه ف بيتي دة امنيه حياتي قعدت تعيط ف جوزي الله يسامحه قالها حاضر يا امي هننزل
زعلت منه وعاتبته جامد و قالي امي عيطت كنت هعمل ايه .. قولتله ما امي لوحدها هل لو كانت طلبت كده كنت هتوافق ؟ قالي لا امي وابويا اولي من امك لو هنفكر فيها وشدينا جامد ودخل علينا رمضان واحنا مش بنتكلم
المهم اول يوم رمضان كان يوم سبت
ف حماتي رنت عليا الضهر عشان نعمل المحشي ف نزلت وحشينا وخلصنا كل حاجه انا وحماتي و قبل المغرب بربع ساعه فضلت تقول لحمايا هما مجوش لية و اتصلت ع حد ف قالها جايين اهو
الاقي سلفتي وجوزها داخلين علينا ف قولت ف نفسي يمكن هي عزماهم
غرفنا انا وسلفتي و هي غسلت المواعين وانا عملت الشاي وبكره عندنا بواقي الاكل ف قولت لحماتي قبل المغرب بساعه هنزل عشان اسخن الاكل
تاني يوم لاقيتها بترن عليا الضهر انزلي عيزاكي
نزلت لاقيتها مطلعه ليا اكل جديد عشان اطبخة قولتلها ما احنا عندنا اكل كتير متبقي حرام كل دا يتركن لتالت يوم قالت اصل سلفتك وسلفك مش بياكلو اكل صابح قولتلها بدل ما تكلميني انا كلميها هي تنزل تطبخ خلينا ممشينا كل يوم واحده فينا تطبخ قالتلي ماهي ف المدرسه وهقولها حاضر
سلفتي جت من شغلها طلعت نامت منزلتش الا قبل المغرب بدقايق ونزلت باتصال حماتي تتحايل عليها تصحي عشان تفطر ياعيني
واستني سلفتي تغسل المواعين لا دي غسلت ايديها ولمينا الاكل سوا وقالت هصلي قولتلها نخلص بس المطبخ سوا ونصلي قالت لا بنسي الصلاه و طلعت شقتها مشوفتهاش وادبست انا ف المواعين
ع الحال دا كل يوم لحد 13 رمضان جبت اخري مبقتش قادره والجو حر مش مستحمله البس اسدال عمري ما لبسته الا ع قد الصلاه ولا بعرف البس عبايات و طبعا حمايا شيخ ف ممنوع البس ترينج واسع وطويل قدامه هيزعل
ناديت ع حماتي عندي و خليت جوزي قاعد هو كمان قولتلها الوضع دا ميرضيش ربنا حضرتك قولتي انزل انا وجوزي مقولتيش اني هنزل اخدم سلفتي لو ع حضرتك و عمو ف انا عنيا ليكم انما مش مجبره اخدم سلفتي ولا سلفي قالتلي موظفه قولتلها اكيد مش هتبقض المرتب الشهر دا و تقسمه عليا بالنص عشان طبختلها وبغسلها المواعين
جوزي ساكت و مش ع لسانه الا كلمه عيب اسكتي
و حماتي فضلت تعيط وتد…عي عليا تقولي الله يسامحك عايزه تفرقي بين ولادي و تحرميني من لمه العيله قولتلها الله يسامحك ع دعوتك عليا وانتي زي امي
عشان كدا يا ست الكل انا هطبخ ف شقتي كل يوم و حضرتك وعمو تفطروا معانا و اول يوم العيد كمان غدانا سوا
قالت انتي عايزه ابني و سلفتك يقولوا عليا اني طردتهم من بيتي قولتلهاا لا قولي مش هرضي لمرات ابني الصغير انها تخدم سلفتها و ياريتها حتي بتغسل المواعين عنها
جوزي شد معايا و هي كمان شدت معايا
محستش بنفسي الا وانا بلبس و مشيت وجوزي كان غضبان مني ونايم ف الليفنج
صحي ملقنيش نزل لامه يشوفني عندها ملقنيش
كلمني مردتش عليه كلم بابا
بابا قالو انت واخد بنتي تراعيك و موصيها متقصرش مع مامتك ولا باباك
مش تكون خد..امه لمرات اخوك و اخوك
لما تبقي تعرف قيمه بنتي البيت انت عارفة
بدل ما جوزي يكلمني يراضيني الاقيه باعتلي فويس يقولي زي ما مشيتي هترجعي وعملي بلو…ك
انا دلوقت مش مستحمله نفسي اقعد ف بيتي و عايزه اعيش ف بيتي ف رمضان والعيد مش عارفه أعمل ايه وحاسه اني غريبه والكل مشفق عليا ويطبطب عليا
اعتبروني اختكم لو مكاني تعملو ايه 💔
