امي بعد ما خر,بت بيتها عايزة تخر,ب بيتي
من غير غلـ،،ـط ولا تجـ،ـريح فيا انا طالبة حل لمشكلتي، أولا انا مش بخيلة ولا عاقة وبعمل كل اللي اقدر عليه عشان ارضي امي لكن انا فعلا تعبت ومش عارفة اتصرف
احنا اربع اخوات بنتين وولدين وابويا طلق امي من سنين كتير وسابنا وقالنا انه مش قادر يعيش مع ماما تاني وانه مفيش حاجة بتملى عينيها وده بصراحة احنا كنا شايفينه بس محدش كان بيتكلم خوفا من لسانها خصوصا انها كانت بتضربنا ضرب مبرح وراح اتجوز وخلف وبعد ما كنا عايشين عيشة مرتاحة ومرفهين بقت العيشة عادية كان بيدينا بس مش زي ما كان عايش معانا وبصراحة على طول بيسأل عننا وللأسف امي على طول كانت تذلنا بالاكل والشرب ولو جابت لحد فينا شراب تقعد تذله بيه مع انها بتاخد معاش كويس من جدي ونفقة وعلى طول معيشانا في رعب وتهديد وكان نفسي اخرج من البيت ده باي شكل خصوصا انا افتقدت ابويا جدا وحنيته عليا اللي مش لاقياها من امي، المهم خطبني شخص محترم جدا مغترب لما اتخرجت وحكيتله بكل صراحة عن ظروفي وقالي متشيليش هم وهجيبلك كل حاجة وكل جهازك وكان بيبعتلي مبلغ شهري كويس اشتري منه كل حاجتي وجهازي والعفش والأجهزة والرفايع والمفارش والملايات والفوط وكل حاجة وكل حاجة بمعنى كل حاجة حتى لبسي وحاجتي الشخصية عشان امي مرضيتش تجيبلي توكة حتى وكانت شهريا بتطلب مني ادفع الكهربا والمياه واجيب لحوم وفراخ وفاكهة وخضار ودروس اخواتي وشيلتني شيلة كبيرة اوي وحمل كبير عليا وبقيت مش عارفة اشتري كل الحاجة من الجهاز ولا حاجة شقتي وكنت محرجة أقول لخطيبي ان الفلوس امي بتاخدها ونزلت اشتغل عشان اعرف اعمل حاجة ومرتبي تاخد منه جزء كبير برضه بقت تاخده والاقيها بتشتري طقم صيني ليها وتغير في الستاير واشترت شاشة تليفزيون جديدة حطتها في اوضتها واتكلمت معاها كتير قلتلها حرام عليكي ارحميني وهقول ايه لخطيبي لما يرجع ويلاقيني مجبتش كل الحاجة اللي متفقين عليها واشتكيت لخلاني وخالاتي بس محدش قادر عليها ومحدش عايز يتكلم معاها، المهم ان خطيبي نزل واستقر خلاص في مصرعشان والدته كانت تعبانة وقلتله ان الفلوس عجزت ومسألنيش وكمل باقي الحاجات اللي ناقصة واتجوزنا الاقي امي وانا عروسة تجيلي من 8 الصبح وتجيب
اخواتي معاها ويقعدوا لحد بليل فطار وغدا وعشا وتفتح التلاجة وتاخد من الخزين ومن اللحوم وتطلب احسن اكل وتقولي عشان اخواتك ياكلوا ولو عملت حاجة معقولة ميعجبهاش وتقولي انتي مش مكسوفة من نفسك ده اكل تأكليه لاخواتك وجوزي مش بيتكلم لدرجة المصروف والاكل كانوا يخصلوا من يوم 10 في الشهر مثلا ومش بيفضل معانا فلوس ده غير ان جوزي مش واخد راحته تماما، وعشان محدش يقول عليا جاحدة ولا بخيلة انا امي بتاخد معاش ليها ولاخواتي الاتنين وليها ورث محل بيتقسم عليها وعلى اخواتها وبابا متكفل بمصاريف الجامعة والمدارس لاخواتي وكلمته وبقى يبعت مبلغ برضه زيادة يعني اللي بيجيلها في الشهر يكفيها ويكفي اخواتي ويعيشهم عيشة كويسة جدا، خلفت بنت الحمدلله وقعدت من الشغل فترة خربت الدنيا وقالتي مترميها لحماتك احنا هنصرف منين يا تنزلي تشتغلي يا تجيبي فلوس لينا من جوزك وفضلت برضه تيجي وكل ما تلاقي معايا فلوس تاخدها وتزعل لما تلاقيني بشتري لبنتي اللبن المخصص للرضع تقولي شربيها لبن سايب ودي مصاريف على الفاضي ومش عايزاني اجيبلها بامبرز تقولي استخدمي كوافيل ووفري عشان مصاريفنا زادت وانا عليا ديون وخلصت إجازة الوضع ورجعت الشغل وقلتلها يا امي المصاريف زادت وبوديها حضانة غالية برضه عشان اقدر ابقى متطمنة عليها مش مقتنعة وعايزة تاخد مني كل مرتبي وتقولي هنجيب منين ولما احكيلها على المصاريف والزنقة تقولي هو جوزك مش راجل هو مسئول عن المصاريف قوليله انك مسئولة عن امك واخواتك وملكيش دعوة بالمصاريف بتاعت البيت ومتدفعيش حتى حضانة البنت او ارميها عند حماتك مهي قاعدة فاضية واعملي حسابك انا محتاجة مصاريف كتير جدا الفترة الجاية وعليا وعليا وعليا وتكركب الدنيا كلها فوق دماغي وتشيلني الطين وتاخد فلوسي سواء من مرتبي او مصروف البيت او أي فلوس جوزي بيديهالي وازورها بالصدفة الاقيها اشترت فرن كهربا وغيرت المطبخ وجددت في البيت وعملت شبابيك الوميتال حتى لما كنت بشتري لبس لبنتي كانت تقولي جوزك يجيبلها انتي جيبي لاخواتك اتكسفي على دمك لما بقيت خلاص هموت ولما أتكلم تقولي انتي جاحدة ومش محترمة وربنا مش هيرضى عنك وهتتحدفي في جهنم وجوزي شايف كل ده وساكت وظروفنا فعلا بقت على القد واوحش من الأول بكتير وجوزي مش قادر يكفي ولا انا قادرة اساعد عشان كل فلوسي رايحة لامي ااقسم بالله فكرت اتطلق من كسفتي من جوزي حتى حماتي واخوات جوزي بيبقوا عندنا ساعات عشان انا ساكنة في بيت عيلة وبيشوفوا اللي بيحصل وبحسهم هيطقوا من جنابهم هما وجوزي بس عشان بيحبوني وعلاقتي بيهم كويسة محدش راضي يحرجني بس معرفش هيفضلوا ساكتين لامتى وانا مليش عين ابص لوش حد فيهم رغم ان محدش فيهم ضايقني ويلاقوا امي كل يومين جاية عندي وواخدة من الخزين والزيت والسكر والرز والجبن واللبن ولو فيه فاكهة تاخد حتى الصابون ومحملة قد كده كل مرة بتيجي وبتمشي وكل ما اقولها انا هديكي مبلغ من مرتبي تقولي ولا يلزمني انتي هتذليني ولا ايه مرتبك كله تحطيه في شنطتي انا عليا التزامات وديون لازم تتسدد وانا عارفة ومتأكدة ان مفيش عليها ديون ولا حاجة وكلمت بابا كتير ينقذني قالي انا سبتها وطفشت منها ومش عايز يبقى ليا أي اتصال بيني وبينها وهي كده ومهما كنت اعملها مكانش بيعجبها وجوزي ابتدى اليومين دول يتعصب ويتخلق عليا على غير عادته من كتر الضغط اللي هو فيه وانا والله خلاص قربت انتحر من اللي انا فيه خلااااااص اعصابي تعبت وتلفت ولا بقيت عارفة اكفي بيتي ولا اراعي جوزي ولا بنتي وبقيت بس بشتغل عشان اصرف على امي واخواتي وبيتي بيتخـ،ـرب حرفيا
