السلام عليكم ورحمة الله تعالى وبركاته
كل عام وأنتم جميعاً طيبين ❤️
أنا شاب ٢٧ سنة بشتغل مهندس بيانات وعندي شقة في كمبوند وهذا من فضل ربي، العام الماضي استخرت ربنا إني أخطب بنت خالي والحمد لله ارتحت ودخلت البيت من بابه وخالي فرح أووووي لأنه مربيني وعارفني كويس جدا وكذلك زوجة خالي رحبت أوي وفرحت، وأما خطيبتي “بنت خالي” فهي طيبة وهادئة ومش بتخرج من البيت ابداً ومتربية كويس تقريبا خااااام خاااالص، مرت ٧ شهور علاقتي بيها طيبة وبحترمها وبحبها ومهتم بيها وبجيب لها هدايا وشيكولاتات وجبت لها موبايل جديد عشان تفرح زي البنات وهي ابتدت تحبني ولكن ردودها كانت جافة شوية بس ده بطبيعتها أنها ملهاش في الكلام الرومانسي وهكذا وحصل بينا شوية شد وخلافات بس كلها بسيطة وتافهة بسبب عصبيتي ولكن الدنيا مشيت وقبل رمضان بأسبوع لقتها بدأت تختفي وأكلمها ألاقيها زعلانة ومنكدة فضلت أزن عليها عشان أعرف مالها وفي الأخر عرفت إن زوجة خالي – ربنا يهديها- خالي كان مؤتمنها على مبلغ مالي وذهب وقالها تشيلهم في البنك عشان ما يتصرفوش وعشان الزمن وجهاز البنت وللاسف صرفتهم وباعت الدهب وصرف فلوسه على أمها وأخواتها وعلى العزائم والأكل والشرب واللبس
وطبعا أنا من قريب قلت لهم شقتي جاهزة ومش باقي إلا العفش ف عايز أعرف هتجيبوا جهاز البنت امتى
من هنا فهمت أن زوجة خالي في ورطة وخائفة خالي يسأل ويطلب ويقولها هاتي الفلوس ف لقيتها بتكلمني وبتقولي صرفني ف مبلغ كذا ولما أقبض الجمعية هردهم وطبعا رفضت اساعدها بس بشياكة وبحجة إني مزنوق ومن هنا الدنيا اتقلبت عليا روحت قبل رمضان بيوم واخد بوكس رمضان ومبلغ كهدية للبنت روحت لقتها قالبة وشها وزعلانة حاولت أفهم مالها معرفتش روحت البيت ولا قالت لي شكرا ولا تسلم ايدك ولا اي حاجه بصراحه اضايقت وحسيت بقلة التقدير عاتبتها برضو مفيش فايدة قلت لها براحتك وفضلت ساكت عدا اسبوع وبرضه ولا كلمتني وصالحتني ولا اي حاجه روحت باعت لها عتاب أخير شافت الرسالة ومردتش ولقتها منزلة استوري وبتهزر وبتضحك معناه إن كلامي مش فارق معاها اشتكيت لخالي ومن هنا الصدمة اتحول عليا وانت اللي نكدي وانت داخل قالب وشك وانت وانت …
ولقيته بيعاتبني عشان نبهتها على الصلاة والاذكار وبيقولي لما تروح بيتك يبقي مشيها على كيفك
وبيعاتبني وبيزعق لي عشان نبهتها وبقولها خلي بالك ومتقعديش قريبة اوي جمب ابن عمك لأن مبقاش صغير وبقي راجل
فضلت مصدوم ومش مستوعب وزعلان اووي
وعمال ألووووم نفسي هل غلطان اني بروح زيارات وبجيب هدايا ؟
هل غلطان عشان نبهت على الصلاة والاختلاط ؟
خالي اتقلب عليا وشوه صورتي قدام البيت كله واني بتاع بنات ومقطع السمكة وذيلها وبيقول متجيش تعدل عليا في بيتي لما تتجوزها يبقي عدل براحتك
واتصل على أبويا وفضل يشتكي له مني وقلب عليا الترابيزة ف ثواني وبابا مش عارف ياخد معاه حق ولا باطل ، راح بابا قاله محصلش حاجه لده كله ده الواد خايف عليها وبرضه خالي مصمم اني شيطان رجيم المهم سكتنا اسبوعين وفي الأخر لما لقيونا مش بنرد عليهم ولا معبرينهم اتحرق دمهم ف بابا قال كفاية وأحاول اتصل وأشوف خالك ماله وافهمه برضو لقيه سخن وشايط مني وكأني قتلت له عيل من عياله راح بابا قاله : ابني مترباش وحقكم علينا وكل شئ قسمه ونصيب وهنا خالي أتصدم صدمة كبيرة واتفاجئ من رد فعل ابويا وتنح لانه كان عشمان أنه يفضل يهزق فيا وبابا يسكت
وفي الأخر كانت الصدمة مرات خالي لما عرفت الدنيا دخلت في الجد والفرح هيقرب وانا جاهز وهما لسه وخالي بدأ يقولها هاتي الفلوس والذهب من البنك عشان نجيب الجهاز للبنت
سخنت خالي وسخنن البنت وقلبتهم عليا وطفشتني بالطريقة عشان اختفي والجوازة تبوظ وخالي ما يسألش عن الفلوس والله والله والله البنت اتقلبت عليا في اسبوع وخلت البنت تقول عليا كلام معملتوش وفضلت تشتكي لابوها مني لحد ما خلوا خالي كرهني والدنيا باظت
انصدمت صدمة كبيرة لما البنت الطيبة ترمي ودنها لأمها وتكرها فيا وتخليها تسوء صورتي مع خالي عشان يطفشوني بحجة أن ابوكي لو عرف هيطلقني
مش عارف اقول لخالي الحقيقة دي ولا اسيبه على عماه
للعلم هي واخدة قروض وعاملة جمعيات ومدمرة الدنيا وخالي فاهم أنها شايلة الفلوس دي
قولوا لي اعمل ايه بصراحه كنت بحب البنت وهي كمان كانت بتحبني بس الله ينتقم من أمها
