وأنا راجع من الشغل من يومين وطبعاً كنت واقف في المترو كالعادة، حصل موقف غريب جداً، كان في شخص لابس لبس غريب كإنه متنكر همس في ودن البنت الي جنبه، والي بعدها بدأت تتوتر وتبص حواليها، ساعتها اتضايقت وقربت منه عشان أشوف لو ضايقها ولا حاجة، بس دي مكنتش المشكلة؛ المشكلة إن الواحدة دي لما باب المترو فتح ونزلت من الباب، في نفس اللحظة دخلت واحدة تانية من الباب الي جنبه، الي خلاني اتصدم من الموقف إن .. إن هى كانت نفس البنت !!
اه كان لبسها متغير، لابسة نضارة شمس، بتحاول تغير مظهرها بس أنا كنت متأكد إنها هى، في تفاصيل بتميز كل شخص، مشيته، حركات وشه، اه قدرت المح كل ده في دقايق بسيطة، وطبيعي أي حد هيسمع الكلام ده هيقول عليا مجنون بس أنا كنت متأكد مية في الماية إنها هى.
عدا محطتين تقريباً وأنا هتجنن لحد ما الباب فتح وقربت مني وهمست في ودني قبل ما تنزل ” لو عايز تفهم كل حاجة تعالى ورايا “، حسيت جسمي اتشل بعد الكلمتين دول، يعني أنا صح، في حاجة مش طبيعية، قطعت تفكيري وقومت ونزلت وراها قبل ما الباب يقفل مره واحدة.
فضلت ماشي وراها لحد ماقعدت عند كرسي من الكراسي الرخام الي بتبقى موجودة، قعدت جنبها، لقيتها بتطلع ورقة جرنار متهالكة من شنطتها وبتدهالي وتقولي ” قبل ما اقول أي حاجة اقرأ الكلام ده “، مسكت الورقة الي موجود فيها فيها خبر بالبونط العريض وقرأت ” انفجار عبوة ناسفة في إحدى قطارات مترو الانفاق مما أدى إلى وفاة ما يقارب من ٥ الآف شخص “، اتصدمت من الكلام، حصل امتى ده، أنا مسمعتش عن.. ثواني، ده الجرنار بتاريخ بكرة !! ووقت الحادثة بتاريخ النهاردة، الساعة ٤:٣٠، يعني بعد..بعد تلت ساعة!! …
مكنتش فاهم اي حاجة، هتجنن، ازاي!! لحد ما بدأت تتكلم، ” ٥ الآف شخص هيموتوا نتيجة فعل شخص مجنون، ٥ الآف شخص بريء هيموتوا بسبب فعل غير مبرر ومنعرفش سببه “، بصتلها وانا مش فاهم حاجة لحد ما قولتلها ” أنا مش فاهم أي حاجة، أنتي مين؟! وازاي جايبالي تواريخ لحجات لسه محصلتش؟! ” قالت ” انا كنت زيي زيك، كل الي حصل إن أنا بعد ما نزلت من المترو في اللحظة الي انتي شوفتني فيها، ايوه أنا نفس البنت الي كانت قاعدة في المترو، بعد ما نزلت قابلت شخص كبير في السن، وكان لابس لبس غريب، اسمه ” مراد”، حكالي كل الي حصل عن الحـ،ـا.د.ثة، طبعاً مصدقتوش، لحد ما عدى نص ساعة وفعلاً الحا.د.ثة حصلت، ساعتها شرحلي كل حاجة وقالي إن في شخص مسؤول عن الحـ،ـا.د.ثة دي والي كان موجود في نفس العربية الي احنا كنا فيها ومعاه العبوة الناسفة ”
لسه هتكلم شاورتلي اسكت وبعدين كملت كلامها ” طبعاً لسه مش فاهم حاجة ومش عارف ايه علاقتك بالموضوع؟! الفكرة وكل مافيها إن مراد عايز يمـ،ـنع الحـ،ـا.د.ثة دي من إنها تتم، حاول كذا مره يمنعها بس للأسف كانت بتحصل في كل مره، واختارني أنا وأنت عشان نقوم بالعملية دي، السبب مجهول، المهم إن دورك بيتمحور في إنك تمنع الشخص من إنه يعمل كده ” لسه هتكلم قاطعتني مره تانية ” طبعاً مستغرب ازاي هتقدر تعمل ده ازاي والحدث خلاص على وشك إنه يتم أساساً!! ” ساعتها رفعت ايديها وشوفت الساعة الي حوالين ايديها، كملت كلام وقالت ” الساعة دي تقدر ترجع بيها للوقت الي انت عايزه “.
